أيش هيا هوية العلامة التجارية وليش جدا مهمة لبراند الأزياء حقك ؟
هوية العلامة التجارية هيا بإختصار أنك تحول براند الأزياء حقك إلى شخص محبوب وعنده كاريزما مميزة يبيع لك الملابس للعملاء ويكون علاقة معاهم ويهتم فيهم ويهتم لإحتياجاتهم لين يصيروا يفضلوه على باقي الأشخاص اللي يبيعوا ملابس وكل عميل أشتره مره وحده يرجع يشتري مره وأثنين وثلاثة عشان التجربة المميزة اللي حصلت عند هذا الشخص
طيب ليش جداً مهمة لبراند الأزياء حقك ؟
لأننا في زمن المنافسة فيه جداً عالية والخيارات جداً كثيرة للعملاء والتواصل ما بين البراند والعميل هو الشيء اللي يسمح للبراند أنوا ينافس في السوق وهنا يجي دور إستراتيجية العلامة التجارية أنها تبني ولاء بين العميل والبراند وتكون جسر تواصل وعلاقات مع العملاء ترجع للبراند ب مبيعات أفضل
طيب أيش مكونات هوية
العلامة التجارية ؟
- هدف : لازم يكون فيه هدف معين للبراند غير الربح ولازم الهدف يصب في مصلحة الفئة المستهدفة
- رؤية : الرؤية من الأشياء اللي تخلي مسار وإتجاه البراند واضح وتسهل على فريق العمل اللي شغال في البراند انهم يعرفوا المهام المطلوبة منهم عشان يحققوا رؤية البراند والرؤية تحقق على المدى البعيد وضروري تكون الرؤية جداً طموحه ومتفائلة وفيه حاجة سامية تفيد الكل وتخلي العالم مكان أفضل
- قيّم : القيّم جزء مهم جداً من الإستراتجية ولازم يكون إختيارها بحرص ولازم العميل يحس فيها في البراند وتكون موجوده في كل جوانب البراند من فريق العمل داخل البراند لـ العملاء وخدمة العملاء
- فئة مستهدفة : الفئة المستهدفة هيا أساس البراند وكل إستراتيجية العلامة التجارية قائمة عليهم مهم جداً دارستهم بعناية حرفياً كل شيء قائم عليهم
- سوق : السوق اللي متواجد فيه منافسين البراند ضروري انوا يكون فيه تحليل دقيق للمنافسين ولنقاط قوتهم ولنقاط ضعفهم عشان يتطور البراند في المنافسة
- مهمة : مهمة البراند مبنية على هدف البراند وتوصل البراند لتحقيق رؤيته وكل فريق العمل لازم يكون عارف أيش مهمة البراند ويسعوا انوا يحققوها على صعيد يومي في كل شيء يخص العمل في البراند
- شخصية : لازم تنبني الشخصية بما يتناسب مع الفئة المستهدفة ولازم يحس العميل بشخصية مميزة في البراند تكون جذابة بالنسبة له وبناءاً عليها يختار البراند على المنافسين
- لهجة : اللهجة هيا أسلوب وطريقة كلام ولازم تكون مستمرة وما تتغير لين العملاء يصيروا يعرفوها ويمييزوها بين المنافسين ولازم تتطبق في كل كتابة محتوى للبراند
- مقولة : لازم يكون عند البراند مقولة مشهورة مكتوبة في كل شيء يخص البراند وتتكرر عند العملاء لين تصير مألوفة عندهم و الأفضل تكون انها قصيرة ومؤثرة
